Kalde vêrmeldingar så langt meteorologane kan sjå, fekk ordføraren i Forsand til å organisera måking og spyling av isen på Stemmetjørn tysdag kveld.

Den litle tjørna like ved Riksveg 13 ovafor Hølleslitunnelen har vore ein svært populær skeiseis. No var isen trygg men med 15 centimeter snø oppå.
Saman med Jone Andreassen frå uteetaten og brannmann Svein Knudsen stilte ordførar Ole Tom Guse med snøfres og brannpumper for å klargjera isen for skeising.

– Det var ikkje nok å bare fresa vekk snøen. For å få skikkeleg god skeiseis, pumpa me vatn oppå det snøfri feltet. Me reknar med at når natta er omme har det frose til skikkeleg stålis, seier ordføraren.

Det var snøfresen til teknisk etat som blei brukt til å rydda isen for snø. Den ryddar 97 centimeter breitt, og var særs effektiv til denne oppgåva.

Totalt var det om lag 20 centimeter tjukk is. Men bare den nedre halvdelen var is av veldig god kvalitet. Men med det nye islaget på toppen, vil interesserte finna ein god rundbane til å skeisa på i tillegg til ein ishockeybane.