Tysdag kan politikarane i Forsand gjera intensjonsvedtak om å overta gamle Flørli kraftstasjon og tilliggande anlegg. Rådmannen rår til overtaking.
Forsand har i fleire år støtta Stavanger kommune sitt prøveprosjekt økonomisk. Dette har hatt som mål å byggja opp ei reiselivssatsing med utgangspunkt i den gamle kraftstasjonsbygninga og tilliggande anlegg.
– Økonomisk har vel ikkje dette prosjektet vore bra, med store underskot kvart år. Har du tru på å få til ei berekraftig utvikling i Flørli?
– Det er rett at det ikkje er meir enn at prøveprosjektet har surra og gått desse åra. Men kor stort rivingsfondet frå Lyse blir, har alt å seia, svarer Årstein Løland, plan- og utviklingssjef i Forsand kommune.
– Vil det ikkje vera lurt å setja rivingsfondet på ein sperra konto i tilfelle ein skulle gi opp prosjektet og vel å riva den gamle kraftstasjonen?
– Eg er litt meir optimist enn det. Eg trur me skal få til eit bra konsept i Flørli. Men det får tida visa. Me gjer ingen bindande vedtak før me har sett på konseptet som skal utviklast på Flørli, seier Løland.
Han er klar over at det er store kostnader med å drifta Flørli. Desse har vore mange gonger større enn inntektene. Men Løland har ei løysing på det også.
– Me er interessert i å byggja eit kraftverk i Flørliåna, som ikkje blir brukt i dag. Straum er ein stor kostnad for Flørli, og kraftverket kan halda oss med varme og lys. Dette er eit punkt også Stavanger kommune har sansen for, seier Løland.