Kraftstasjonen i Flørli har veldige dimensjonar og kan samanliknast med ein katedral. Dermed passar det godt at kunsten til Per Odd Aarrestad fyller kraftstasjonen i år.
Mellom anna har han stilt ut glasmåleri som han har laga for Ræge kyrkje på Sola. I sommar har dei fått plass i vindauga i den gamle kraftstasjonen i Flørli. Altertavla som skal til Frøyland / Orstad kyrkje er også utstilt i hallen. Relieffet skal bli 12 meter høgt.

«Flørlihallen og  det sakrale» heiter utstillinga til Aarrestad. Han stiller spørsmål om kva som får eit rom til å verka hellig. Er det arkitekturen eller er det kunsten rommet blir pynta med? Også Peter Brandes har bidratt med kunstverk for å få fram det sakrale i hallen. Han arbeider med utsmykking av Roskilde kyrkje i Danmark.

Ansvarleg for plassering av kunsten i den store kraftstasjonshallen er Agnes Tiffon. Ho er einaste fastbuande i Flørli og kan ikkje forstå at nokon vurderer å riva den gamle kraftstasjonen.

– År må gå før turismen tar seg opp som ved andre attraksjonar langs Lysefjorden som har hatt meir tid til å bli kjent, som til dømes Kjerag. Det er ikkje mange som kjem til Flørli for å sjå kunsten. Eg trur det må brukast tid og ressursar på å gjera staden kjent først, ikkje minst i utlandet, seier Agnes Tiffon.

Ho er ikkje i tvil om at mange vil ha stor glede av å oppleva Lysefjorden og Flørli. Naturen, trappene og ikkje minst kraftstasjonen gir noko til folk. Ho og fleire med ho har stått på for å bevara den gamle kraftstasjonsbygningen etter at Lyse vedtok å riva den. No har Tiffon og Lysefjorden Utvikling AS overtatt stafettpinnen etter mellom anna Hanne Thomsen.

I tillegg til kunstverka til Aarrestad og Brandes inneheld bygningen ein utstilling av Ingvar Blychert om Flørlibygda med tema dei som drog, dei som kom og dei som er. Medan Anne Madsen har fotografert detaljar i Flørli.