– No spøkjer det for Eventyrskogen, seier Eldfinn Austigard, skaparen av den populære turstien i Årdal. Eventyrskogen, slik folk kjenner han, kan no bli historie.

Ein ny grunneigar har ifølgje Hjelmeland kommune sett ned foten for at eventyrfigurane kan ha tilhaldsstad på eigedomen hans. Eventyrskogen vart lansert i november 2007, og sidan den gong har det årleg vore kring 6.000 besøkande.

Eventyrskogen er saman med fjellgardane Ramsfjell i Jøsenfjorden blitt næringsprosjektet Nasjonal turistveg Ryfylke sitt satsingsområde i Hjelmeland kommune. I samband med dette har ein vore i dialog med grunneigarane, med tanke på å få til ein langsiktig avtale om bruk av grunnmarka i Eventyrskogen.

Haldis K. Nilsen, kommunesjef bygdeutvikling i Hjelmeland kommune, fortel at dei har sendt eit skriv til grunneigarane der ein ber om å få tilbakemelding dersom grunneigarane ikkje ville godta planane for Eventyrskogen. I førstninga var alle dei sju grunneigarane i området positive til planane.

– Men kring juletider i 2009 fekk me munnleg tilbakemelding frå grunneigar Karstein Sie om at han ikkje ville godta vidare bruk av hans eigedom til å plassera figurane i Eventyrskogen, seier Nilsen til Strandbuen.

Karstein Sie hevdar derimot at han aldri har hatt noko mot Eventyrskogen, men vil ikkje kommentera saka ytterlegare.

Grunnlaget for Eventyrskogen har heilt sidan starten vore basert på uendeleg mange dugnadstimar for Eldfinn Austigard og velvilje frå alle grunneigarane. Sundag ettermiddag var Eldfinn Austigard på nytt på tokt i Eventyrskogen. Denne gongen var det ikkje for å setja på plass nye trefigurar, men for å ta ned dei som alt var der.

– Nei, eg kan stadfesta at mesteparten av figurane no er flytta til ein lagerplass i den nedre enden av Eventyrskogen. Etter kvart vil eg også fjerna dei andre figurane som ligg langsmed turstien, fortel Austigard.

Han legg ikkje skjul på at han helst vil halda på ideen om å ha ein eventyrskog i Årdal. – Eg håpar me kan få til ei interessant rundløype i den nedre enden av skogen, seier Austigard til Strandbuen.