Håheller blir ikkje lyst ut for sal i denne omgang. Årsaka er at det først skal arrangerast ein intern bodrunde blant syskena som eig garden.

Norunn Nordbø i Eiendomsmegler1 vil ikkje seia noko om kva bod som har kome inn i denne saka. Men innrømmer at interessa for garden har vore stor.
Njål Egeland er ein av dei tre brørne som eig Håheller. Han driv gard i Årdal og har brukt Håheller-garden som beite i mange år. Gjennom advokatfirmaet Stavangeradvokatene har han klaga på taksten på garden som blei fastsett til fem millionar kroner.

– Ein så høg konsesjonspris vil ikkje kunne gi ei forsvarleg landbruksmessig drift. Det ser heller ikkje ut til at investeringar som må gjerast i forhold til skog og ikkje minst i forhold til gjenoppbygging/restaurering av eksisterande bevaringsverdig bygningsmasse er tatt tilstrekkeleg omsyn til, skriv advokat Odd Jo Forsell.

Garden Håheller er på over 20.000 dekar og har fått ein øvre lovlege marknadsverdi på 4.850.000 kroner. Garden Håheller var i si tid ein praktfull eigedom i Lysefjorden. I mange år har garden stått til nedfalls. Håheller inngår i fylkeskommunen sin kulturminneplan som eit høgt prioritert kulturminne.
Overflatedyrka jord, skog og anna areal er taksert til 3.870.000 kroner. Våningshuset er taksert til 75.000 kroner og restar av driftsbygning til 25.000 kroner. Ei lita hytte på heia er taksert til 130.000 kroner og jaktrettigheitane til 750.000 kroner.

– Kvifor har du klaga på taksten?
– Eg har blitt råda til å gjera det. Ikkje bare fordi eg synest fem millionar kroner er for dyrt for Håheller. Her er det tatt takst etter nye retningsliner. Blir denne taksten ståande vil den også gi konsekvensar for andre gardbrukarar. Denne taksten er ein katastrofe for alle som driv gard i dag, seier Njål Egeland.