Bilen var på veg frå Årdal mot Hjelmeland då han køyrde i grøfta i Riskedalsbrekka, i den første svingen etter slutten på 60-grensa. Føraren, ein mann i 40-åra, var åleine i bilen, opplyser politiet sin leiar på ulykkesstaden, Kjetil Mjåtveit.

– Me har snakka med eit vitne i ein annan bil, og mistenker at ulykka skjedde i samband med ei forbikøyring der farten også kan ha vore relativt høg, seier Mjåtveit.

Føraren var bevisst og tok seg ut av bilen ved eiga hjelp. Han snakka med brann- og ambulansemannskapa som var på plassen før politiet.

– Han blei teken hand om av ambulansetenesta etter å ha klaga over smerter i ryggen, opplyser Kjetil Mjåtveit.

Mannen blei sendt vidare med luftambulanse.