Kva skal barnet heita?
PREIKESTOLEN: Det blei debatt etter at ordførarane i Forsand, Strand og Hjelmeland la ut eit bilde på Facebook der dei hadde skrive under på at kommunen skal heita «Preikestolen kommune». (Skjermbilde frå Facebook) Foto: (Skjermbilde frå Facebook)
Onsdag denne veka skal kommunestyra i Forsand og Hjelmeland bestemma om dei skal snakka med kvarandre og Strand om ei eventuell samanslåing. På internett og i dei tusen heimar går debatten om kva namn kommunen i så fall skal få.
KOMMENTAR:
Ordførarane i dei tre kommunane, Ole Tom Guse (KrF) frå Forsand, Helge Steinsvåg (Ap) frå Strand og Trine Lotherington Danielsen (H) frå Hjelmeland la i helga ut eit bilde på Facebook. Dei har vore på studietur saman i Helsinki, og har litt spøkefullt signert ein «avtale» om at den nye kommunen skal heita Preikestolen kommune. Steinsvåg har rett nok teke atterhald om at den kan heita Strand. I kommentarane til bildet, er det mange som har forslag til namn.
Nokre kommentatorar har leika seg med å setja saman namn der Preikestolen blir brukt saman med andre stadnamn. «Jørpestolen» og «Strandstolen» er blant forslaga. Andre har brukt namna til ordførarane, og lansert forslag som «Gusevåg» og «Gusevågton». Andre forslag er «Lysefjorden», «Strandalandet» eller enkelt og greitt «Lyse». «Ryfylke», «Ryfylkefjordane» og «Ytre Ryfylke» er også blant namna som blir trekte fram.
I tidlegare debattar har me sett andre forslag. Somme vil halda på namnet til sin heimkommune i dag, og både Forsand, Strand og Hjelmeland har blitt føreslege. Andre har prøvd med kombinasjonar som «Forstrand» eller «Hjelmestrand». Det er også andre stadnamn som blir trekte fram som alternativ til nytt kommunenamn – mellom anna «Tau» eller «Tou», «Idse» og «Jørpeland».
«Kjerag kommune», og det litt meir kuriøse «Bolten kommune», har også blitt diskutert. Det same har «Uburen kommune», oppkalla etter fjellet som reiser seg bak Forsandbygda. For å unngå drakamp mellom Jørpeland og Tau, har namnet «Eika kommune» eller «Eigå kommune» blitt lansert som eit meir nøytralt alternativ.
I Hjelmeland er det fleire som hentar fram att namnet «Austfjord». Dette namnet var det nøytrale alternativet då Årdal, Hjelmeland og Fister slo seg saman i 1965, men det enda altså med at den nye kommunen fekk namnet Hjelmeland. Årdalsbuen, som motvillig blei slegne saman med Hjelmeland og Fister, var særleg opptekne av at kommunenamnet måtte vera noko anna enn Hjelmeland. 91 prosent av årdalsbuane røysta for ei samanslåing av Årdal og Strand.Me har også sett at det har vore forslag om «Høgsfjord» og «Jøsenfjorden» som kommunenamn, men dei er kanskje meir aktuelle dersom Forsand vender seg mot Sandnes eller Hjelmeland vender seg mot Suldal.
Dessverre er det mest opplagde av alle alternativ, «Årdal kommune», allereie i bruk i Sogn og Fjordane.
Kva meiner du? Kva namn vil du ha om dei tre kommunane i Ytre Ryfylke slår seg saman? Debatten går på Strandbuen si nettavis, på Strandbuen si Facebook-side og med det første vil Strandbuen også gje deg høve til å røysta på forslaga. Det er sikkert mange som har andre forslag enn desse, men her er ein del av forslaga me har sett i diskusjonar på nett:
– Forsand– Strand– Hjelmeland– Preikestolen– Lysefjorden– Lyse– Strandalandet– Ryfylke– Ytre Ryfylke– Ryfylkefjordane– Jørpeland- Tau– Tou– Idse– Kjerag– Bolten– Uburen– Eika– Eigå– Austfjord
Kommentarer til denne saken