Hjelmeland Røde Kors har køyrd opp skispor frå Bjødnabu til Kaldavatnet og vidare inn til Svartatjødnå.

– Me har fått ein god sole under spora, og prøver å halda spora friske etter kvart som det kjem nysnø på toppen. Målet er å køyra opp spora kvar dag om det legg seg ny snø, seier Lars Martin Riskedal i Hjelmeland Røde Kors.

Han meiner det er gode forhold sjølv om det er nokre tuer og buskar som stikk opp av snøen her og der.

– Det er 30-40 centimeter med snø, og det er fint å gå på ski, fortel han.

Tidlegare år har Røde Kors køyrd opp spor vidare innover Bønarheia til Skorvå. Det kan bli aktuelt også i år.

– Ja, me utvidar løypenettet litt etter litt, og køyrer gjerne til Skorvå om vinteren held seg. Men me skulle gjerne hatt litt meir snø for å få gode forhold innover i heia, seier Riskedal.

Han fortel også at det blir køyrd opp spor mellom Bjødnabu og ein annan parkeringsplass onsdag kveld.

– Me køyrer spor frå Bjødnabu og via Måmyra til Geisfjell. Me har hatt spor her òg tidlegare, men det er nokre år sidan sist, opplyser Riskedal.

I Lyngsheia er det ikkje køyrd opp spor ennå denne sesongen, men Norsk Folkehjelp Strand og Forsand opplyser at dei skal køyra spor fredag morgon slik at det er klart til helga. Då skal dei også måla kor tjukk isen er på vatna i Lyngsheia og legga ut meir informasjon om dette på Facebook-sida si.

Det er venta mildare vêr og kanskje litt regn i låglandet til helga, men i fjellet kjem nedbøren som snø.