FOTBALL: Hjelmeland hadde sine første treningar i slutten av mai. Då hadde ikkje spelarane trena saman sidan mars i fjor. Til hausten skal dei spela ein halv sesong i 6. divisjon.

Då Strandbuen snakka med trenar Tor Magne Håland i vår, var han usikker på kven av spelarane som framleis ville vera aktive når fotballen starta opp att. Nå kan han slå fast at dei aller fleste satsar vidare.

– Det er ingen som har lagt opp på grunn av koronapausen, så spelarstallen ser ganske bra ut. Minuset er at ein del av dei unge spelarane har meldt overgang til MIL og Staal der dei har fått spela juniorfotball medan seniorfotballen har hatt pause. På plussida har me endå yngre spelarar frå G16-laget til Hjelmeland som bankar på døra til A-laget. Dei har trena godt heile tida, seier han.

Håland fortel at dei har hatt gode treningar i sommar, men det passa litt dårleg at dei fekk starta opp att kort tid før folk byrja på feriane sine.

– Det betyr at me ikkje har fått trena skikkeleg med heile troppen. Det er nok andre lag som har trena meir enn oss gjennom koronaen. Me hadde nokre få treningar i fjor sommar, men det blei for mykje skiftande reglar og styr og spelarar som pendlar, så det blei med det, seier han.

Det gjer at han ikkje har så veldige ambisjonar til den korte serien i haust. Blikket er i staden retta mot neste sesong.

– Me tek kampane i haust som ei gjennomkøyring der målet er å overleva i 6. divisjon. Til neste år skal me ha eit betre grunnlag, meiner han.

Hjelmeland møter mellom anna erkerivalen Suldal og Staal Jørpeland 2 i si pulje i 6. divisjon.

– Det betyr at me truleg må spela mot nokre av dei unge juniorane me gjerne skulle hatt med på laget vårt eitt år eller to til, seier Tor Magne Håland.