Det er berre fire seksåringar som skal byrja på skulen til hausten, men dei er samde om at dei har hatt ein fin tur når Strandbuen får vera med og eta is med dei utanfor butikken på Hjelmeland etter returen fredag ettermiddag.

– Me har bada i elva, fortel dei.

– Og alle foreldra måtte uti, ler seksåringane.

– Men det blei berre dypping av tåa for min del, innrømmer Roger Sellevoll, ein av fedrane.

I Trodla-Tysdal har dei sove i turisthytta og sett draken i fjellsida over vatnet.

– Kva har vore kjekkast då? Badinga?

– Nei, det kjekkaste har vore å gå turen fram og tilbake, meiner Ingeborg Helgøy.

Anne Espeland Halsne i Fister barnehage synest den årlege turen til Trodla-Tysdal har blitt ein fin tradisjon. Ho er imponert over kor flinke barna er til å gå.

– Det er godt humør heile vegen, og i dag gjekk dei turen heim att frå Trodla-Tysdal til Kleivaland på tre og ein halv time. Det er godt gjort, meiner ho.

Det er ingenting som tyder på at Fister barnehage kjem til å endra på opplegget for avslutningsturane etter ti år med Trodla-Tysdal.